La bielezza da Cjargna
quant ch'a no plôf
e i oms son a cjasa
e su las monz lûs la nêf
e i pez lontans
l'àn già scjassada
e las cjampanas
rìvin puartadas
dal coton da l'aria
a è biela la Cjargna
encje quant che 'l soreli
'l côr devôr a nêf
e nassin sot i pez
las prìmulas
las vìlias tra i sterps
i sclopons tai prâz
e il cîl 'l è blu
e las ostarias vuèitas
e i gèis mòntin las ribas
sot un grumut di vuès
ch'a s'ingegnin a mòviu
a è simpi biela la Cjargna
e apena tas vals
si sìntin las côz
e las batadòrias
e il sgrifignâ das fòrcjas
su una vecja crosta di cjera
pocadas da genôi
ch'a no àn plui
una schena di om da strengi
'l è quasi un cjant
la bielezza da Cjargna
e dopo quant che ormai
las fueas devèntin colôrs
prima di deventâ foet
e il prin frêt sbassa
i ucei e las vacjas
e i flâz fàsin cristai
ta l'aria
e las monz tòrnin blancjas
e la speranza a è un treno
o una coriera
e dut samea una fiesta
a è imò plui biela la Cjargna
ma pòde èssi bielezza
chel sudâ cence pòusas
chei paîs cence oms
chel lavôr cence cjanz
chel soreli ch'al divît
chê sêt ch'a rosea
chê gioventût ch'a si 'n' va
pòde èssi bielezza chesta?
o sclavitût debolezza
sconfuart
di vuàitis ch'i si 'n' làis
e incoscienza egoismo
miseria
di vuàitis ch'i restais?
Retici saluti
TSdG